原著：Jason Fitzpatrick《Use Better Tools to Be a Better Student in 2010》
翻译：好南儿
脚馒机（laptop）、上网本（notebook）发展了快头势，但是大多数学生用电脑赛过来拉用隻三千多块个打字机。其实读书好甮介辛苦，用好电脑里个家生就好四两拨千斤变成好学生。
照片：Brad K.
每个学期全有批新生跑进我个教室，佢拉多数全装备著脚馒机。最近几个学期，我非正式个研究过佢拉哪恁用电脑。我总认为学生会得充分发挥电脑个潜力帮佢拉读书、研究，实际高头佢拉只不过担脚馒机当天价打字机、即时消息终端用。
假使不用电脑帮侬便利化大学生活，侬脚馒头高头超过60年代之前全世界计算能力个电脑有啥用场？下头就教大家哪恁避免担辰光浪费拉枯燥个琐事高头，而是花拉真正好出成绩个学习搭研究高头。
一、电脑好做，侬就覅动
覅啥朆寻简单个方式就去做苦生活，电脑高头样样式式个用件就是用来自动完成任务个。碰着啥枯燥个任务先用搜寻引擎搜搜看阿有好自动完成个方法。不怪是为班级活动缩放照片、改文件名字，还是要轧电子表格里个数字，先查查看阿有简单、自动个办法？
照片：striatic
文件改名器：搭海海威个文件改名字板定是侬担当过个顶讨惹厌、顶吃辰光个任务了。覅再浪费箇个辰光哉。侬用PC，就查查看大劲个Bulk Rename Utility，佢有隻布满拣权个仪表盘；或者Ken Rename，佢没介吓人，但是也牢来事个。假使侬用Mac，侬好去下载隻类似File List个专门效件；侬也好了解了解Automator，文件改名对佢来讲是小儿科唻。
文字替换：除非侬来拉写第五大名著，侬总归要打相当多重複个物事。侬个电邮地址、侬个常用短语咾啥，侬发现做笔记、写论文个辰光箇眼格式化个物事反反覆覆要打。看上去像煞呒没几许，但是侬用文字替换个说话一学期好省落交关辰光。文字替换是哪恁桩事体呢？各種文字替换家生运作起来大同小异，两種方法是顶基本个：即时替换搭热键。
用替换，侬好讴电脑用隻字符串去替换每一处目的字符串——譬方担“notes1”代替侬记笔记顶欢喜个子弹单格式，又譬方担“mymail”代替侬电邮个完整地址。
用热键，侬好担隻短语派畀两三隻速记字符加隻热键。譬方讲，我担隻短语设成功XXX+Tab。打箇隻短语只要揿四键；假使完全手打，就要五十三键。
假使侬用PC，就试试看阿拉自产个文字替换家生Texter，也好试试看别样健唻个家生，譬方Phrase Express。Mac用户应该查查看TextExpander，或者再熟悉熟悉雪豹里向文字替换家生。Linux用户呢， 试试看AutoKey。
不怪准备做啥，你总归好来拉网上寻着隻家生来自动完成任务，顶起码好让箇个任务便当眼。侬要养成习惯：不怪做啥，先问自家“阿好让电脑做了快一眼，让我打字少打眼？”日长世久侬就居著一套快速完成日常任务个家生哉。
二、键盘捷径
每样程序个键盘捷径全去学一学：文字处理器、笔记家生、电邮客户端。明明揿一两键就好完成个任务，还要担鼠标甩来甩去几许呒没效率，也牢不适意个。上课辰光侬掯支褃支来拉记笔记，侬阿愿意停落来为著活化“子弹单格式”来拉家生条高头或者菜单里向翻来翻去？天底下每種操作系统、每隻用件侬全好寻着捷径单，用Google搜寻“用件 捷径 单子”好寻着个捷径比侬晓得个还要多。
照片：John A. Ward
三、笔记记了好眼
记笔记是種艺术，有一点是牢清爽个——记笔记不是简单个担娜老师讲个物事或者课本里个粗式字和总记落来。哪恁记笔记因人而异，箇个受各人学习风格影响大唻邪拉，但是每个人全好通过此地一两隻贴士来提升记笔记个技能。
照片：D’Arcy Norman.
学眼记笔记个技巧：阿拉分享过《哪恁更加有效率记笔记》，还有哪恁利用不同个笔记风格。侬会得发现要提升记笔记效率，网上向个资源並不匮乏。侬好通过搜寻专门主题笔记技巧来磨练记笔记个技能——做“中世纪文学”笔记个方式搭做“有机化学”总归两样个。
钢笔掼脱：
欢喜手写笔记个人总归欢喜手写。对于认为物事记拉Moleskin高头更加好个人，阿拉用不着去劝佢掼脱钢笔。别个人么，娜要晓得，笔记记拉纸头上是上个世纪个事体唻。2010年，侬有啥个理由不用动态个、富媒体个、有得交叉索引个、随时随地好用个笔记？难道侬期末真个打算来拉几百页个手写笔记里向寻一沰沰信息？覅箇恁。搜笔记顶好赛过搜Google恁介个搜寻引擎介便当。
Microsoft OneNote搭Evernote两種笔记家生邪气流行，流行得了旧年阿拉就让佢拉来拉读者投票里对决哉。箇个两隻用件吓杀人个特性靠一段文章是讲不光个，但是阿拉笃定讲，佢拉全有得卓越个系统：搜寻（还有得手写识别话）、组织、存取侬个笔记。我样样全用OneNote记，从研究生院教书记到为Lifehacker写作。侬好查阅阿拉对OneNote搭Evernote个概述。
四、连网使用电脑
阿拉要讲个不是啥来拉人人网上加娜班里个每个同学，而是积极使用在线家生来学习、来搭同学互动。信息时代带来著超互连个好处，分享笔记、讨论功课搭班级话题、合作小组计劃只不过是侬利用个一小部分。
照片：krossbow.
分享笔记：话起分享笔记，我常庄听到个头一声反对是：不愿意分享自家个劳动成果，人家也不应该从中受益。邪气公平。侬哪恁对待参与娜班级群搭笔记分享会个人是侬个事体；但是作为老师我要讲畀侬听：不高兴自家记笔记个人其实不是班级里侬要去竞争个尖子。
分享笔记搭合作个方式多唻，但是降低门槛再好用上箇眼方法——多数人不高兴就为著一隻课程去注册一连串服务。既然Gmail户头几乎人手一隻，个Google个笔记簿搭文档两隻家生再好也没了。侬也好利用Luminotes之类个免费家生建立自家个汇机（wiki），或者担MediaWiki订做成侬自家个合作私服。
建立联络网：不怪是人人网里个分组、电邮单子还是电话号码单子，侬聪明点就要弄隻好马上搭同学联系个方式。功课里个问题、班级里个事体或者侬缺席辰光错过啥，发邮件问要好同学得到回覆总归比从老师搭听到消息快。箇个还好帮侬建立隻同行联络单——虽然呒没新生心理学110课程介要紧，但是毕业之前侬忙于修习专题课程、拜会职业道路上侬想保持联络个人，难就要紧哉。
五、备份，备份，备份
侬呒啥理由不备份数据。没个。数据（尤其是文字材料、课堂笔记构成个小容量数据）备份个方法多了海海威，覅为自家戆搭搭个担劳动成果和总保管拉一隻硬盘或者闪存里向寻借口。
照片：Jeff Wilcox.
Dropbox：免费个，一隻基本户头好储存一个学期个成果，外加好同步到侬所有个电脑，还好同步到网上。“我不当心担功课删脱了”箇種借口十年前头就不灵光，难总更加不可原谅。侬好担密码、OneNote笔记簿同步上去，随便啥地方你全好存取欢喜绿色用件。
在线备份：虽然Dropbox同步文件一隻顶，不过侬干劲十足个说话，定规想试试看完备个电脑备份家生，像啥Mozy搭Carbonite。更多信息请查阅阿拉个《Windows高头顶襸个五隻备份家生》。
侬阿曾用过啥个家生来提升笔记、学习或者读书体验？阿拉阿有忽略侬顶欢喜个技巧？个么请侬来拉下头个评论里让阿拉看看。