2008年，南北朝鲜统一，隔手搭日本一淘派人自说自话跑到中国来考古。话咾发现块讴“月灵”个石刀，居著佢就好打开讴“灵鼓臺”个时空之门。日本人极右翼分子井上源搭一个朝鲜女考古队员前后脚进去，担一个朝鲜男人坂本关拉门外头。
井上回到1909年10月26号个哈尔滨，担刺杀韩国统监伊藤博文个安重根杀脱。伊藤朆死，难么历史就改脱哉。“日韩合併”情原进行，但是由伊藤出任朝鲜总督（呒没曾祢荒助、寺内正毅啥事体）。井上晓得后首一百年个历史发展，佢就通过伊藤逐步担历史拨正反乱。
1909年，韩国“三一独立运动”性质改成功“塔洞公园非法民众集会”。
1921年，井上继任朝鲜总督。
1932年，正史里来拉上海刺杀河端贞次、白川义则等人个尹奉吉畀人家击毙。
1936年，日美联军参加二战。
1943年，日军进占伪满。
1945年，原子弹掼拉柏林，二战结束。
1960年，日本获得联合国常任理事国资格。
1965年，樱花一号卫星发射升空。
1988年个奥运会蹲拉名古屋召开。
2002年，日本主办世界杯，李东国代表日本队进球。
2009年，日本第三都市个京城（汉城）市中心，立个铜像不是李舜臣，而是丰臣秀吉；车子全是靠左行驶个；忠武路还是讴“本町”……
改变历史后井上家族担月灵、灵鼓臺运到日本，严守秘密。但是来拉箇块併入日本版图个半岛上，还是有一部分人晓得正史是哪恁样子个——覅忘记，当初从正史回到1909年个除脱井上，还有一个朝鲜女考古队员。箇眼人组成“自由朝鲜”组织，一径想搞着月灵搭灵鼓臺。而日本调查局（JBI）个特务坂本搭佢个出窠兄弟同事西乡来拉受命打击自由朝鲜个过程中，各自逐步发现真相。梦里常庄显现自家“前世”獃瞪瞪看牢女考古队员吸进时空之门个坂本接过自由朝鲜个衣钵，打算回到1909年刺杀井上，而西乡也受命回到1909年阻止坂本。最终，坂本杀脱井上、西乡，安重根杀脱伊藤，历史步入正轨。坂本破坏灵鼓臺个辰光总算碰着前世看到个女考古队员，携手抗日。到著第三趟2009年，第二趟2009年里向个自由朝鲜战士全老平和地生活拉重新统一个朝鲜半岛上……
箇个就是《2009记忆迷失》（2009 Lost Memories）整隻流程。佢隻时空观搭好南儿小辰光通过日本动漫接触到个有眼两样。老早印象比较深个两種时空观分别以《机器猫》搭《七龙珠》为代表。
前者多数情况是前头隻时空发生个事体当前隻时空到辰光还会得发生，外加不怪侬哪恁改变现在总归避不开个。譬方前头隻时空个好南儿12月30号跑到31号去看吴语协会有啥新个帖子，箇隻时空个好南儿等到12月30号情原会得跑到31号去。箇種时空观发展到极致就是好南儿回到1879年送隻白炽灯畀爱迪生，难么世界上再会得有白炽灯。至于好南儿箇隻时空个白炽灯，是前头隻时空个好南儿回到箇隻时空1879年让爱迪生“发明”个。少数情况是由于晓得将来个事体而去改变现在结果影响将来。譬方通过明朝个报纸晓得半夜三更隔壁邻舍发生撬窃，个么好南儿今朝夜里就守拉佢拉屋里，结果贼骨头看到房间里有人就不来了。再看从将来拿来个报纸，撬窃个报道寻不着了……
再讲《七龙珠》，佢里向时空搭时空之间是浑身不搭界个。前头隻时空个孙悟空死于心脏病，Trunks担药送畀箇隻时空个孙悟空，好担佢救活，但是前头隻时空个孙悟空是活不转来个。
《终结者》（Terminator）、《死神来哉》（Final Destination，不过佢呒没典型个穿越情节）个时空观基本上搭《2009记忆迷失》、《机器猫》少数情况一致。
《终结者Ⅰ》其实是《机器猫》多数情况一类个。2029年天网派T-800回到1984年去杀人类领袖John拉孃Sarah——1984年个Sarah死脱，个么2029年个John就不存在哉，天网就好战胜人类。John么派Reese回到1984年去救还朆结婚个Sarah。结果Reese搭Sarah坠入爱河，Sarah怀上John（就是讲，儿子比爷先养出来）。其实Reese来拉将来就已经看中Sarah哉，因为John畀过佢张Sarah年轻辰光个照片。影片末结，1984年Sarah通过隻加油站个辰光人家帮佢拍著张照（也就是将来John畀拉Reese箇张）。《终结者Ⅱ》上半段还是延续箇種时空观。Ⅰ讲John派Reese回到1984年，结果让Sarah怀著John；Ⅱ就讲Dyson受T-800残骸启发着手开发天网，而T-800本生就是将来个天网造出来个。不过下半段时空观就变脱了。Sarah佢拉最终阻止Dyson，天网也就造不起来哉。后首来个时空观就搭《机器猫》多数情况不一样了。《终结者Ⅲ》、《终结者Ⅳ》表明，虽然Sarah佢拉阻止著《终结者Ⅰ》、《终结者Ⅱ》讲个1999年个核爆。但是核爆还是发生了，只不过推迟到2004年。《终结者Ⅱ》上半段个T-800是老野蛮个，通过小John个调教逐步改变。《终结者Ⅲ》里向个T-800一上来就晓得哪恁寻轿车个钥匙、哪恁阻止警察又不害杀佢拉。
最后讲《超人Ⅰ》（1978年Christopher Reeve主演），佢隻情况有眼特殊。呒没多重时空，一塌括子就一隻时空，但是超人好担佢倒转去。Louis罹难，Clark就让地球倒转，回到Louis遭困个辰光，Clark再担佢救下来。