0.0 汉字搭Unicode
处理古僻汉字，就用Unicode字集里向个汉字——目前收录个统一汉字已经有得74394隻。假使箇个里向还寻不着侬要个字，个么就用IDS表示，文章不打印个说话尽量覅自家造字。
Unicode里向搭汉字搭界个字块包括汉日朝统一表意字（CJK、汉统，20940隻）、汉日朝统一表意字扩充甲（Ext-A、扩甲，6582隻）、汉日朝统一表意字扩充乙（Ext-B、扩乙，42711隻）、汉日朝统一表意字扩充丙（Ext-C、扩丙，4149隻）、汉日朝部首增补、汉日朝笔劃、汉日朝兼容表意字、汉日朝兼容表意字增补咾啥。下头阿拉主要讨论汉日朝统一表意字四隻字块七万五千隻汉字个事体。至于一般性个繁体字、异体字，任何支持GBK个输入法（譬方微软、紫光、Google）全好解决，本文不再赘叙。
0.0.1 Unicode里向四块汉日朝统一表意字
Unicode 1.0.1初建“汉日朝统一表意字”时，收字20902隻，Unicode 4.1箇块加著22隻字符，Unicode 5.2箇块又加著16隻。20902隻字符GBK全收入个，22隻字符GB 18030收著8隻部首。个咾汉统压末38隻字符一般性个字库顶多显示8隻，
Unifonts 5.4好显示22隻。
