1.0 字库
一般只要装好合适个字库（担下载好个字库文件拖到Windows＼Fonts文件夹里）就好显示国际音标了。
1.0.1 分类
本文担音标字库按照是否映射尤一码（Unicode）字符分成功尤一码字库搭非尤一码字库两大类，前者再分两隻小类。
1.0.2 为啥提倡用尤一码字库
非尤一码来拉汉字处理方面容易出现个问题好南儿也讲过两趟（一、二），处理国际音标道理差大勿多。非尤一码字库往往是第一種情况，佢个音标字符占用著尤一码里“基本拉丁字母”“拉丁-1增补”两隻字块别样字符个码点。造成个后果是：勿装特定字库，音标看上去蛮正常个（就是看勿懂是何里種语言）；一旦格式落脱（譬方以txt文件储存），就算字库装好要担音标从字母丛里恢復出来也吃力煞。
华东师范大学出版社个《当代大学日语1》就是邪气好个反面典型。本书上i段假名注音和总侪有[æ]个，ぢ末标[düi]，に标[-i]，ひ标[ci]，し呢标[¡i]也勿晓得标啥。出现箇排里乱码，顶大个可能是作者写书用著某種非尤一码个字库，而出版社勿晓得或者勿懂经，书就箇恁介印出来了。箇隻字库里向，[ʲ、ʒ、ɲ、ç、ʃ]占用著[æ、ü、-、c、¡]个码点。字库朆装就显示[æ、ü、-、c、¡]，装好字库（还要保证格式朆乱脱再好）显示[ʲ、ʒ、ɲ、ç、ʃ]。假使用个是尤一码[ʲ、ʒ、ɲ、ç、ʃ]，显示勿出勿搭界，装好字库就可以了，勿关格式啥事体。
1.1 纯尤一码字库
侬假使是Windows用户，假使侬还用MS Office，个末好南儿要告诉侬桩事体——纯尤一码个音标字库十几年来一径来拉侬个电脑里。别个语言勿敢打包票，处理英语国际音标绰绰有余。
1.1.1 98
十五年之前，微软发布Windows 98，里向隻字库讴Lucida Sans Unicode。侭管Win98还朆完全支持尤一码，但是利用箇隻字库阿拉已经好来拉写字板（rtf格式，感谢Jimmy TSAON辛勤测试）或者Word 97里向处理英语音标了。
1.1.2 2000、xp、2003
后首来微软又发布著Office 2000，里向有隻字库讴Arial Unicode MS。佢搭Lucida Sans Unicode担西欧眼常见语言用着个国际音标侪覆盖了，汉藏语末有眼勉强。
1.1.3 Vista、2008、7
从Windows Vista开始，诸如Arial（勿是Arial Unicode MS）、Courier New、Tahoma、Times New Roman眼常用个拉丁字母字库也覆盖尤一码里几隻音标字块了，外加支持几隻汉藏语特有个音标[ɿ、ʅ、ʮ、ʯ、ȶ、ȡ、ȵ、ᴀ、ᴇ]。个咾Vista、2008、7版Windows用户直接好看到此地个音标。
而Win Vista搭Office 2007自带个新字库——Segoe UI覆盖个音标字块比上述Vista里四隻字体还要多。
到著Win 7，Arial咾啥又升级了，覆盖个音标字块搭Segoe UI差大勿多哉。Arial Unicode MS搭Lucida Sans Unicode反而呒啥更新（一如2000－xp－2003时代，仅仅支持[ɿ、ʅ]）。
Arial 5.06下载页面（先要关脱别样程序，再担旧版Arial删脱，然后再好装箇隻新版个。）
1.1.4 Unifonts
诶，朆搞赚脱。海峰做个Unifonts 6.0（中日韩汉字超大字符集通用字体支持包）勿但支持扩充汉字，还支持国际音标（做来Sun-ExtA里）。收字规模勿比上头几隻推扳。
1.2 类尤一码字库
箇节讲到个字库，除脱提供尤一码里个音标，还加著眼朆尤一码收录个音标。佢拉要末加到私用区（Private Use Area），要末占用别个字符个码点，但是总体来讲还算尤一码字库。
1.2.1 IPAPANNEW
潘悟云教授新做个字库。
1.2.2 IeaUnicode
江荻教授新做个字库。
来拉蓝蝶国际音标输入法2.0里向。
1.2.3 Lingoes Unicode
灵格斯词霸所带字库。
1.2.4 Charis SIL、Doulos SIL、Gentium Plus
1.3 非尤一码字库
非尤一码字库虽然勿提倡，讲还是要稍许讲一讲个。佢拉往往有箇恁隻特征，侬打“ABCD123”，改成功箇隻字库显示个就勿是“ABCD123”唻。
1.3.1 IpaPanADD
潘悟云教授早年做个字库。后首推出IPAPANNEW个辰光还提供隻Word宏（就来拉1.2.1链接个压缩包里），好担doc文档里个IpaPanADD音标转成功IPAPANNEW个，箇个生活做得了几许清爽。
1.3.2 Ipajadd SILDoulos
江荻教授早年做个字库。
1.3.3 Kingsoft Phonetic Plain
金山软件个特色字库。尤一码音标字库发展著十三年，Win 2k（自此Windows机内码用utf-16）发布著十一年，啥人还来拉寻Ksphonet.ttf隻音标又少、编码又勿是尤一码个字库真是作孽唻。
1.4 诺基亚手机
手机高头要显示国际音标末，勿妨使用好南儿改制个微软正黑体。
2.0 显示搭储存
2.1 网页显示
既然Lucida Sans Unicode一径来拉Windows里，为啥Vista之前版个用户看勿到《国际音标处理·序章》里个音标呢？估计仅当一隻网页朆设任何字库，而用户担Internet Explorer“以拉丁文为基础的字符集”个字库设成功Lucida Sans Unicode或者一隻网页自身设了Lucida Sans Unicode，网页高头个音标再看得到。网页假使设别样字库，或者设著多種字库但是Lucida Sans Unicode朆排第一，个末音标还是显示勿出。箇个是IE自身个缺陷造成个。
为著让最广大大陆网民（xp＋IE 6）看到网页里个音标，只好：
- 讴网页作者和总担Lucida Sans Unicode排了第一。缺点：别样勿讲，Lucida Sans Unicode虽然满足西欧语言注音需求，但是音标总归还是忒少；
- 安装Unifonts，解决扩充汉字个同时担音标也带带脱。缺点：音标虽然全了，卖相实在勿敢恭维，宋体个拉丁字母大家有数脉个；
- 用别个浏览器，譬方克罗米12、遨游3（要极速模式，兼容模式搭IE一样个）咾啥，佢拉没IE 6介戆（网页设个字库显示勿全就勿调用别样字库了）；
- 用新版Arial替换旧版，考虑到设定Arial个网页比较多（作兴当初吴语协会就是因此主推箇隻字库），个末勿调浏览器也影响勿大……
2.2 文字处理软件
记事簿一类个软件只好设定单一字库，1.1节提到个字库侪好用，除脱Arial Unicode MS。因为佢包括汉字个，而佢个汉字是韩国字形，一般人适应勿了。别个字库呒没汉字，文章里个汉字会得继续以宋体显示。假使碰着非尤一码音标写个txt文档，难死蟹一隻唻。
写字板咾啥好处理多種字库个软件，个就呒啥好关照个了……