旧文分割，呒啥花头——此文本生搭《Win7花样经·字库安装搭设定》是一淘个，现在拆开来。
为著适应液晶屏，Windows从Vista开始介面字库一改以往个点阵字库而转用矢量字库：“简体中文版”用Microsoft Yahei（微软雅黑），“繁體中文版”用Microsoft Jhenghei（微软正黑体），日语版用Meiryo UI（meiryo即“明了”，UI即“用户介面”），朝鲜语版用Malgun Gothic（malgun也是清爽个意思，gothic是黑体），英语版用Segoe UI……依次如图所示。
好南儿用目测个戆办法比较著Windows“简体中文版”从XP到Vista、7个字库。Vista新增字库大总六十四隻，交关是希伯来字母搭泰文个字库。比起Vista，7又加著十五隻字库，有几隻字库包括个字块侪是以往Windows字库勿支持个：专门搭伐依字（Vai）、吾夸字母（NKo）、蒂非拿盍字母（Tifinagh）、索马里字母（Osmanya）设计个Ebrima，专门搭高棉文设计个Khmer UI，专门搭傣文设计个Microsoft Tai Le，专门搭新傣文设计Microsoft New Tai Lue，还有专门搭八思巴字设计个Microsoft PhagsPa。
Windows XP后新增七十九隻字库样图见底下长图，长是长得来……
Windows字体个变化勿单单是字库增加，一眼字库个字集也扩大了。譬方XP里个Arial 3.00支持29隻字块1419隻字符，国际音标多数显示勿出；到著Vista，Arial 3.11支持35隻字块2564隻字符，新支持“国际音标扩充”、“音标扩充”几块；箇歇7里个Arial 5.06支持40隻字块2814隻字符，新支持“合併辨音记认增补”、“音标扩充增补”几块。汉字方面，宋体搭细明体来拉XP之后除脱“汉日朝统一表意字”（CJK），进一步支持“汉日朝统一表意字扩充甲”（Ext-A）、“汉日朝统一表意字扩充乙”（Ext-B）两块。当然，刚刚发布个“汉日朝统一表意字扩充丙块”是呒啥字库支持个，用户要用只好另外安装Unifonts 5.4。新个介面字体微软雅黑搭微软正黑体收录汉字个范围呒啥两样，侪支持“汉日朝统一表意字”、“汉日朝统一表意字扩充甲”两块。楷体搭仿宋名字一变，交关铜镬獃脱了，实际上呒啥。
版本：Windows 7 Build 7600.16384