好南儿部落

九品网络电视装好著哪恁放也放不出。随便开何里隻频道，缓冲到100％就停脱了，一眼反应也呒没，网络流量倒是居高不下。难道箇隻p2p播放器只晓得p2p，不晓得播放？
首先想着防火墙个设置，我用个是卡巴斯基互联网安全套装7.0，用学习模式。先对九品个主程序9ptv.exe设置“全部允许”个规则，外加不去扫描佢个网络流量，结果仍原不来事。我索介让卡巴斯基暂停，再开九品，箇记来三了。放脱一歇，我再开卡巴斯基，也没问题。看来来拉缓冲完成阶段，从九品广告切换到频道广告个辰光，出著啥个事体。
过脱两日，我卸载莫妮卡版KMPlayer后，着陌生头发现九品网视好看了，卡巴斯基开来许也不搭界。虽然讲莫妮卡也好，www0也好，做个集成版KMP用起来蛮便当个，但是现在我还只好用转不带Real等解码器个原版KMP。要看rmvb咾啥个说话就装只Real Alternative（或者Real Player 10.6）。
顺带便讲一句，Real Player 11一眼也不灵个。交关rmvb视频放不出，外加装个辰光还要连网安装CNNIC插件，否则就装不落去。