12月24号，腾讯发布“QQ2009 正式版 SP2”。个么箇个有啥值得推荐个呢，仅仅因为佢用传统汉字？当然不是。QQ除脱“简体版”，别样版本全没“迷你首页”隻老鬼三个，也不会得有绕不断折不断个通知弹法弹法。但是，英语版、国际版箇歇功能还朆完善，个咾好南儿不推荐。只有“繁体版”顶顶接近花样经实透个“简体版”——群共享好用，QQ音乐揿纽也有……“繁体版”还有隻特点就是人家发得来个汉字消息佢会得和总搭侬转成功繁写字。
假使侬覅用“繁体版”，又想屏蔽个“迷你首页”搭广告，侬好自家动手破解QQ2009SP5“简体版”本地会员。
11月12号，傲游浏览器2.5.10.2994版发布。对好南儿来讲，2.5.10版是从2.5.1版以来顶顶重要个版本。为啥？为著“窗框”——
2.5.1版之前个傲游阿要显示浏览器窗框是好让用户自家拣个，但是从2.5.1.4075版开始，为著“架构革新”，显示窗框个功能就屏蔽脱了。交关用户为著界面美观个问题搭傲游提意见。实际上，窗框有不有不单单是美观个事体。傲游呒没窗框就不好搭别个窗门平铺，来拉Windows 7高头不好飒纳（snap）。为著箇隻问题，不怪xp、vista还是箇歇用个7，我一径靠2.1.5.1250混日脚。
箇两日，天空、华军、霏凡等网站一眼下载页面全出现一大块彩虹QQ个广告，话咾FinePlus个完美论坛高头也有佢个广告（今朝去脱了）。
自从珊瑚虫作者吃著官司，同类软件有種介停止开发，有種介保持低调。彩虹QQ襸唻，箇恁介高调推广——佢搭腾讯阿会得有啥关系……