好南儿部落

0.1 缘起

好南儿闲早也写过两篇国际音标输入输出方面个文章，但是勿够全面、深入，近枪打算照牢《Windows高头古僻汉字输入方法》个模式来系统个谈一谈。正式谈之前，阿拉先来看眼国际音标字符。

0.2 音标

话起国际音标，有種铜镬脑子里马上反映出“四十四隻”咾“四十八隻”咾……但是单单下头列出来个辅音（图片版：肺流、非肺流）就勿罢八十隻了。

除脱辅音，还有元音、一眼零零碎碎个音标搭著交交关关辨音符、超音段符号，搁落三门毛两百隻。而“四十四”咾“四十八”咾指个不过是英语个音位，四十八隻音位大总用着三十几隻音标。我伲挨下来要谈个当然勿单单是箇个三十几隻个事体。

0.2.1 题外

08年年底好南儿做过隻汉化版个国际音标表。一份贴来吴语协会个吴越百科上，箇歇已经没了。一份畀来灵格斯词霸，一开始灵格斯也是箇恁登出来个。但是勿晓得啥道理，后续版本Kevin YAU又担整埭龈腭音删脱了，弄佢勿懂。

0.3 提要

箇趟初步打算讲箇恁几桩事体：

0.3.1 显示

首先解决显示问题。譬方上头列出八十几辅音音标，根据经验，Window XP＋IE6用户只好看到几十隻方块……但是利用XP（覅讲XP唻，Win 2k就可以）自身个字库绝大多数侪好显示出来，根本用勿着求东求西求字体。XP＋克罗米（Chrome）应该直接看得到上头绝大多数辅音。

0.3.2 输入

挨下来末反过来，谈谈哪恁打音标。方法包括专用个键盘搭输入法、非专用输入法搭著从办公软件里插字符咾啥。

0.3.3 易混音标字符辨析

打得来、看得出之后就要讲一讲一眼经常碰着个两类相似字符混淆个情况。一类是“别字”，音标字符搭音标字符混淆；另外类是“错字”，指音标字符搭非音标字符混淆。譬方《[人类起源] 序 七百万年的非洲人》就担喌（吴语读tsoh）音字符搭别样字符搞赚脱了。

0.3.4 常见语言处理注意

就算大家侪用“国际音标”，但是针对具体语言个辰光，侪有得变通个地方。学习个语言一多，就会得碰着变通造成个困扰。譬方英语个[p]搭法语个[p]，汉语人听起来大推大扳。

0.3.5 Ksphonet.ttf

箇隻字库摆拉上个世纪末还算蛮派用场个，担佢介绍畀来英语、法语师生真叫助人为乐。箇个几年，啥人再介绍Ksphonet绝对是误人子弟，阿拉要重点批评。

0.3.6 还朆想着

想着著再讲……

0.4 参考

李龙、潘悟云《国际音标输入法及其实现》

John WELLS 2006年七月份个文章